Lohkkireive sáddejuvvon Ávvirii 19.06.2011. Ii vel prentejuvvon 26.06.

På norsk

Maid mearkkaša hálddašanguovlu?

Romssa suohkan lea mearridan searvat sámegiela hálddašanguvlui, ja máŋggas illudit, daid gaskkas Sámediggi ja Ávvir. Ja lea illudahtti ahte Romssa suohkanstivrra eanetlohku háliida nannet sámegiela ja addit sámegielat romsalaččaid buorit fálaldaga. Muhto sihke Ávvir ja sámediggeáirasat geat leat cealkán oaiviliideaset Ávviris namuhit dušše maid dat mearrádus mearkkaša sámegielat sámiide, ii fal earáide Romssas. Ávvira doaimmaheaddji čállá velá 17.06.2011 (s. 2): "Mii eat sáhte jáhkkit ahte dát mearrádus galgá vuolggahit issoras riidduid sápmelaččaid ja earáid gaskkas, go ii hal dát mearrádus goit boađe čuohcat earáid, eará go sápmelaččaid."

Lea go duođaid nu? Ieš lean čájehan kronihkas, mii almmuhuvvui Ávviris 07.06., ahte hálddašanguovlu váikkuha buohkaide ee. dan láhkái ahte buot oahppit galget lohkat sámi oahppoplána. Dát čálus lei prentejuvvon maiddái Finnmark Dagbladis ja Ságahis moadde beaivvi ovdal, ja ii oktage leat čuoččuhan aviissain ahte mu dieđut leat boastut. Baicce nuppe láhkái, NRK interneahttasiidduin čilgejuvvo 15.06. juste daid njuolggadusaid masa lean čujuhan. Sámediggi čállá ieš internehtii: "ja oahppit sámi guovlluin, gč. Oahpahuslága §6-1, galget oažžut oahpahusa Máhttolokten - Sámi mielde." () Muhto sámediggeráđđi Ellinor Marita Jåma ii namat dan, ii ge Ávvira jearahallamis, ii ge Sámedikki siidduin. Dan ii daga ge sámediggepresideanta, Finnmark Dagblada kronihkas 16.06. Son dušše cealká ahte go suohkan searvá hálddašanguvlui de dat mearkkaša ahte suohkan dohkkeha ahte suohkanis leat sámit. Ii Romssa várresátnejođiheaddji ge namut sámi oahppoplána jearahallamis Ávviriin.

Danin ferten jearrat:
- Goappás lea riekta, Ávvir vai Sámediggi/NRK?
- Dihtet go Romssa politihkkarat maid ieža leat mearridan?
- Geahččalit go muhtin sámepolitihkkarat čiegadit maid sámi hálddašanguovlu mielddisbuktá?
- Lohká go Ávvira doaimmaheaddji iežas aviissa?

Svein Lund


Eanet artihkkalat sámi áššiid birra
Álgosiidui

sveilund@online.no