MII EAT JIENAS EO-BEALUŠTEDDJIID !

- Dán jagi in jienas dan bellodaga maid álohii lean jienastan. Sii eai leat vuhtiiváldán maid dábálaš olbmot oaivvildit EO-áššis. Dál lea vuosttaš geardi go ozan eará listtu. In leat vuos mearridan guđe bellodaga áiggun jienastit, muhto dat ferte leat okta mii čielgasit manná EO vuostá.

Dien dadjá Ragnar Samuelsen Billávuonas Porsáŋggus. Johan Johannesen, Čuđegiettis, moadde miilla olgolis vuonas, doarju su ollásit. Goappašagat leaba leamaš guolásteaddjit, dál soai oažžuba lámisoaju. Soai leaba garrasit bargan vuotnabivdiid guolástanvuoigatvuođaid ovddas. Dál lea Johan Sámi Dálolaččaid Searvvi jođiheaddji ja Ragnar fas nubbi jođiheaddji.

- Muhto jus Norga oažžu dakkár šiehtadusa maid guolástanministtar dohkkeha, maid doai dalle lohkabeahtti? - Dat ii rievdat maidege. Ii goitge šatta eambbo go gaskaboddosaš spiehkastat. Mii diehtit makkár ressursahálddašeami EO fievrreda, sin guolástanpolitihka leat mii vásihan. Guolástanministtar čohkká ráđđehusas, mii mearragáttiin fertet ieža jurddašit.

- Muhto iigo sáhte oažžut sierra sámi guolástanguovllu mii sáhttá gáhttet EO-fatnasiid vuostá ?
- Olggobeale EO mii gal soaitit oažžut diekkár guovllu. Muhto mis ii leat makkárge doaivva ahte EO dohkkeha bistevaš spiehkastagaid min guovlluide. Dat han lea buot EO vuođđoprinsihpaid vuostá. Ii ábut čujuhit internášuvnnalaš eamiálbmotšiehtadussii nu guhká go EO ii leat dan dohkkehan.

Ragnar ja Johan ballaba sakka ahte EO-miellahttovuohta mielddisbuktá eanet meahccegeavaheami.
- Buot rievdadusat mat dál dahkkojit, dagahit turistaide álkibun muhto váddáseabbon báikkálaš olbmuide. Leat riggát geat besset bivdit mehciin ja jávriin, eatge mii geat leat atnán dáid guovlluid lassiealáhussan. Dál galget eiseváldit čielgasit dieđihit makkár rievdadusat bohtet EEO ja EO bokte.

EO gažaldat ii mearriduvvo dušše álbmojienastemiin. Stuoradiggi lea dál ovttatládje mearrideame heivehallamiid EO:ai. Dat sáhttet dušše bissehuvvot jus Stuoradikkis lea eanetlohku EO vuostá. Danin berrejit buot EO-vuostálastit jienastit EO-vuostálasti kandidahtaid. Dán jagi lea dat deháleabbo go buot eará áššit.

____________________________________________.

Sámegillii: Inger Anna Gaup Gustad

Denne artikkelen på norsk

____________________________________________

Eará artihkkalat EU:a birra

Eará artihkkalat sámegillii

álgosiidui

sveilund@online.no