På norskLohkkireive sáddejuvvon Ávvirii 20.01.2010
Guokte vahku leat mannan, muhto in oainne ahte oktage leat šállošan dahje divvon dán cealkámuša. Danin ferte jearrat lea go duođaid dát sámediggepresideantta ja Sámedikki oaidnu.
Cealkámuš ferte ipmirdit nu ahte dál lea oahpponeavvodilli viimmat buorre, sámi ohppiin lea sámegielat oahpponeavvut buot fágain. Ja dan lea dálá Sámediggi čoavdán, dušše dainna ahte lea juolludan ruđa gurret Sámedikki iežas ja moatti lágádusa vuorkkáid. Muhto jus dát doallá deaivása, de dat mearkkaša ahte gávdnui juo ovdalgihtii buot dárbbašlaš oahpponeavvut, ja áidna maid dárbbašii dahkat lei distribueret daid skuvllaide.
Dát ii leat vuosttaš geardi ahte čuoččuhuvvo ahte gávdno doarvái sámegiel oahpponeavvut. Dan dagai oahpahusdepartemeanta juo badjel logi jagi áigi, ja dalle sii geavahedje dan ággan heaittihit konverterenlasáhusa oahpaheddjiide geat oahpahedje sámegillii. Dál boahtá seamma čuoččuhus Sámedikkis. Mun sávan ahte Sámediggi dál sáhttá dahkat dan maid departemeanta dalle ii nagodan, juogo duođaštit čuoččuhusa dahje geassit dan ruovttoluotta.
Svein Lund
Sámi skuvlahistorjjá doaimmaheaddji