• Mii geat geahččalit oahppat sámegiela leat guhká váillahan dárogiel - sámegiel sátnegirjji. Ieš lean guhká ráhčan Thor Frette boares girjjiin, mii bođii jagis 1975, lea boares čállinvuogi mielde ja ii leat leamaš oastimis mánga jahkái. Danin ledjen hui ilolaš go Davvi Girji jagis 1994 almmuhii ahte dal leat dárogiel-sámegiel sátnegirjjit boahtime. Galge boahtit sihke stuora girji ja unna girjjáš. Jagi dan mannil bođii stuora sátnegirji sámegielas-dárogillii, ja diibmá bođii viimmát hui unna sátnegirjjáš dárogielas -sámegillii.
Moadde vahku áiggi gávdnen Davvi Girjji interneahttasiidduid. Doppe lei stuora girjekataloga gos lei almmuhuvvon ahte stuora dárogiel-sámegiel sátnegirji lei boahtán jagis 1997. Seamma jagis lei maiddái boahtán sátnegirjjit sámegielas engelasgillii ja duiskagillii. Ja ledje almmuhan ollu oahppogirjjiid joatkkaskuvla váras.
• Interneahttasiiddus lei čállon ahte dáid girjjit sáhtii diŋgot Davvi Girjjis. Ja mun ledjen nu jalla ahte jáhkken ahte dat lei duohta. Čállen Davvi Girjái ja diŋgojin ođđa girjjiid, muhto beaivvi maŋŋil ožžon reivve ruovttoluotta dáinna kommentarain: «Disse bøkene kan du fá kjøpt gjennom Finnmark Kontorservice Kautokeino. Hilsen Marit Gaup. 21.1.98.» (Ii han leat mu sivva ahte Davvi Girji vástida dárogillii go čállá sámegillii sidjiide.)
Nu fal. Ja mun Kontorservicii. Doppe ii gávdnon ovttage dain girjjiin ja fertejin jearrat gávpehoavddas: Gos dat girjjit leat? - In mun dieđe, vástidii, mii oažžut visot maid Davvi Girji almmuha, muhto dáid girjjiid mii eat leat ožžon.
Ja de son čuojahii Davvi Girjái gos vástidedje ahte dat girjjit eai boađe ovdal geasi.
• Dal in sáhte orrut jaskat šat. Mu mielas lea skandala ahte ii gávdno dárogiel-sámegiel sátnegirji. Ja ovddasvástadus dása lea lágadus Davvi Girji mii lea lohpidan dan mánga jagi. Jus sii ii livčče lohpidan sátnegirjji farga, de livččii sihkkarit muhtin eará lágadus ráhkadan dan.
Joatkkaskuvllas eai gávdno oahppogirjjit sámegielas dálá oahppoplána mielde. Oahpahusdepartemeanta lea ánkke mearridan heaitihit oahpaheddjiid liigeressursa oahponeavvováilu geažil, Dáinna ággain ahte boahtte jagi rájes mis leat doarvái sámegiel oahppogirjjit. Departemeantabirokráhtat eai loga sámegiela eai ge geahča skuvllain ja girjegávppiin mii gávdno. Sii lohket dušše katalogaid, ja Davvi Girjji kataloga mielde gávdnojit dievva girjjit mat eai gávdno duohta máilmmis. Danin lágadus ii dušše fille kundáriid, muhto fille maiddái eiseválddiid jáhkit ahte sámegiela dilli lea ollu buoret go duođaid lea.