"Mineralláhka ii sihkkarastte sámiid rivttiid luondduduohtademiid oktavuođas, ii ge dat sihkkarastte dan ahte mii beassat leat fárus mearrádusaid hábmenbargguin ja oažžut ávkki diekkár doaimmain. Danin ii sáhte NSR dál doarjut mineráladoaimmaid sámi guovlluin." Nie mearridii Norgga Sámiid Riikkasearvvi riikkačoahkkin 2012 čavčča.
NSR sámediggeáirras Ávjovári válgabiires Mathis Nilsen Eira, gii dál gieskat maid lea válljejuvvon FeFo stivrii, dajai čakčat ná NSR neahttasiidui: "Otná mineralláhka ii vuhtiiváldde doarvái bures sámiid beroštumiid. Danin lea NSR mearridan ahte ii áiggo doarjut ruvkedoaimmaid sámi guovlluin. – Sámediggi ferte čielgasit čájehit ahte lea vuostá ruvkedoaimmaid ásaheapmái Sámis. NSR galgá dáhkidit ahte nu dahkko, lohpida Máhtte. Son muitá bures dalle go dalá Sámediggepresideanta Ole Henrik Magga bissehii ruvkefitnodaga bargguid Ráiteváris. – Mii leat gearggus dál maid bissehit ruvkefitnodagaid bargguid jus eai gula min oaiviliid." (Čálus lea viččojuvvvon dáppe: nsr.no)
NSR lea čájehan garra vuostehágu Fálesnuori ja Johkamohke ruvkedoaimmaide. Dat lea buorre.
Biedjovákkis Guovdageainnu suohkanis leat dál nággemin álggahit veaike- ja golleroggamiid. Biedjovággi lea maid dakkár guovlu go duot ovdalis namuhuvvon guovllut, gos ruvkedoaibma boahtá billistit luonddu ja leat hehttehussan boazodollui. Liikká lea NSR dán áššis leamaš áibbas jávoheapmi, sihke báikkálaš dásis ja maiddái guovddášstivrejumi bealis. Jus ozat "Biedjovággi" sáni NSR neahttasiiddus, de dat ii oppanassiige gávdno. Guovdageainnu suohkanstivrra leat Sámiálbmot bellodagas (SÁB) 5 áirasa, geain eatnasiin leat dahje leat leamaš luohttevašdoaimmat NSR:as. Muhto dien bellodagas ja bellodaga suohkanstivrajoavkkus ii lea oppanassiige oktasaš politihkka Biedjovákki ektui. Sátnejođiheaddji lea ovddeš NSR-jođiheaddji ja NSR sámedigegáirras. Son hálida dohkkehit Arctic Gold plánaprográmma, mii mearkkaša ahte ruvkefitnodat galgá beassat addit suohkanii daid dieđuid maid sii iežas hálidit addit, maid sii gohčodit "váikkuhusguorahallamin". Su oainnu doarju stuorát dahje unnit oassi SÁB joavkkus. Guovdageainnu álbmogis leat oallugat ruvkeplánaid vuostá, ja dál orro mannamin dan guvlui ahte leat NSR-miellahtut geat sihkkarastet ruvkedoaimmaide doarjaga suohkanstivrras. Ii go bellodaga ovttajienalaš riikkačoahkkinmearrádus guoskka Guovdageidnui?
Ávjovári Luonddugáhttenlihttu
Svein Lund, jođiheaddji
Elle Márjá Vars, čálli