Go dál sihke ruvkefitnodagat ja stáhta eiseválddit leat ohcame minerálaid miehtá Finnmárkku, lea hui dehálaš ahte álggu rájes biddjojuvvo gáibádusat sihke doibmii ja dan maŋŋá čorgemii. Erenoamáš dehálaš lea ahte bázahusat eai biddjo merrii eai ge stuora vuorkkáide meahcis, muhto geavahuvvo ávkalaš geavaheapmái ja/dahje devdojuvvo ruovttoluotta ruvkkiide.
Dál leat golbma stuora ruvke doaimmas Finnmárkkus, ja guovttis dain luitet bázahusaid merrii. Dát lea vuohki maid Luonddugáhttenlihttu ii sáhte dohkkehit, ja mii leat maiddái garrasit vuostálastán Nussira plánaid luoitit mirkkolaš bázahusaid Riehppovutnii.
Dál lea Biedjovákki ruvkkiide ráhkaduvvon plánaprográmma, maid Guovdageainnu suohkanstivra galgá gieđahallat 20.03. Dalle mii sávvat ahte suohkan bidjá dakkár gáibádusaid ruvkedoibmii ahte dat ii galgga bilidit luonddu agibeaivái, ii galgga nuoskkidit čázádagaid ja ii galgga hehttet boazodoalu. Dát ferte leat čielga eavttut jus galgá dohkkehit ruvkedoaimma. Jus dál ii leat vejolaš ollášuhttit daid eavttuid, de lea buoret ahte málbma ain báhcá doppe eatnamis dassái go lea vejolaš roggat riggodagaid bilitkeahttá luonddu.
Svein Lund
Guovdageainnu luonddugáhttenlihtu jođiheaddji