Lohkkireive Ávviris 01.07.2011. 26.06.
På norsk
Ruvkedoaibma luonddugáhttemin?
Finnmark Dagblad aviissas 27.06.2011 ovdanbuktá Morten Often, Store Norske Gull fitnodaga ohcanhoavda, buori vehkiin journalisttas Robin Røkke Johanseniin erenoamáš muitalusa: Ráitevári guovllus Kárášjogas lea eana lunddolaččat nu nuoskkiduvvon ahte galggašii váldojuvvot eret, go das lea nu ollu lossa metálla. Dakkárat leat váralaččat jus leat meahcis. Danin sáhttá luonddu dáppe gohčodit erenoamášdoapparin. Danin lea buorre ahte mis leat ruvkefitnodagat mat fállejit midjiide gáhttet luonddu iežas vuostá, dan láhkái ahte rogget buot eatnamiid ja bávttiid, vai váldet eret buot váralaš minerálaid ja riššasuvrri mii dás golgá.
Ii leat mihkkege ođas ahte ruvkedoaimmat geahččalit unnidit iežaset doaimmaid negatiiva bohtosiid. Muhto ahte sii geahččalit ovdanbuktit ruvkedoaimma buori dahkun, mas luondu gáhttejuvvo luonddu vuostá, dat gal lea hirbmat ođastus. Mii fertet dušše sávvat Store Norske Gull ovttas Finnmark Dagblad:in lihkku dán erenoamáš propagandaovdánahttimiin. Go mis leat dákkár aviissat, de ruvkedoaimmat eai dárbbaš sierra PR-ossodaga. FD dahká dan barggu sidjiide nuvttá.
Often lea geologa ja berre danin diehtit man birra son hállá. Muhto seammás son ovddasta
kommersiella stáhtafitnodaga Store Norske Gull ja gieskat son lei NGU dutki. Minerálaohcamis vázzet dutkit ja kommersiella fitnodagat giehtalaga. Muhto ii go gávdno oktage rehálaš ja bealátkeahtes geologa, gii sáhtášii čilget mii lea duohtavuohta?
Svein Lund ja Rávdná Anti, Luonddugáhttenlihtu miellahtut
Álgosiidui
sveilund@online.no