Luonddugáhttenlihtu bealis mii eat dieđe visot, ja danin lei mu logaldallamis maiddái máŋga rabas gažaldaga. Ja ávžžuhin sin geat ledje čoahkkimis veahkehit vástidit. 6 suohkanstivrra áirrasa ja vel earát čoahkkimis válde dán hástálusa ja muitaledje maid dihte.
Dál hásttalan Jan Ole ja eará ruvkebealušteddjiid vel oktii: Muital midjiide mii lei boastut, Ávvir addá sihkarit saji dasa. Mu logaldallan lea interneahtas, čujuhusas http://naturvernforbundet.no/getfile.php/Fylkeslag%20-%20Finnmark/Bilde/bidjopres-s.pdf. Jan Ole cealká ahte lea ártet go mii háliidit dieđuid, muhto eat hálit váikkuhusguorahallama. Dasa lean juo diibmá vástidan aviissain (http://www.sveinlund.info/miljo/konsekvens.htm).
Dál čilgejin fas čoahkkimis: Mii eat luohtte guorahallamii maid gollefitnodat ieš diŋgo ja máksá, go konsuleanttat dahket maid bargoaddi bivdá. Erenoamážit dál, go olmmoš gii Rambølla konsulentafitnodaga bealis lei guovddaš plánaprográmma ráhkadeamis, dál lea Árctic Golda stivraláhttun.
Čoahkkimii lei boahtán Torulf Olsen, Fálesnuoris. Son sáhttii muitalit ahte Nussira váikkuhusguorahallamis ledje sullii 2300 siiddu(!). Geain lea áigi ja máhttu dárkkistit dákkára? Lohke go Fálesnuori suohkanstivraáirrasat dát siidduid dárkkilit ovdal go mearridedje dohkkehit ruvkeplánaid? Vaikko lei váttis, de vuostaldeaddjit Fálesnuoris leat gávdnan dehálaš meattáhusaid Nussira guorahallamis, mat addet boastu dieđuid das man ollu ruvke váikkošii lundui. Ja Birasdirektoráhta lea dohkkehan daid boastu dieđuid, ja dál áigu ráđđehus dohkehit dan ja diktit Nussira luoitit buot mirkkuid vutnii. Dákkár diliid eat hálit Guovdageidnui, ja danin dagai Guovdageainnu suohkanstivra áibbas riekta go hilgui Arctic Golda plánaid. Sávan ahte sii doalahit dan vaikko makkár lohpadusat boađaše dál.
Svein Lund
Ávjovári luonddugáhttenlihttu