Muitosánit sáddejuvvon Ávvirii 24.11.2008.

Ruth Rye Josefsen muitun

Ruth Rye Josefsen lea guođđán min, 85 jagi boarisin. Mii leat máŋggas geat leat beassan rahčat ovttas suinna, go son lea beroštan máŋgga servodatáššis ja searvan máŋgga servviide. Ruth lei erenoamáš áŋgiris berošteaddjin; bargiidseađu ja fágasearvvi bealis, Áltá-Guovdageaidnoeanu suodjaleami ja sámi vuoigatvuođaid bealis ja ii unnimusat son ražai EU-miellahttovuođa vuostá. Erenoamáš beakkánin son šattai go jođihii Álbmotakšuvnna Áltá-Guovdageaidnoeanu dulvadeami vuostá, ja go logi jagi dan maŋŋá lei vuosttaš Sámedikki áirrasin.

Máŋgga jagi lei Ruth doaimmalaččat mielde Ii fal EU-searvvis, sihke báikkálaččat Álttás, fylkkadásis ja riikkadásis. Vaikko son lei áigá juo ollen ealáhatahkái, de ii ballan váldit badjelasas ovdasvástádusa. Nu maŋŋit go 2004:s, 81 jagi boarisin, válljejuvvui Finnmárkku Ii fal EU jođiheaddjin. Dan barggu son válddii vaikko son fertii seammás fuolahit olbmuid iežas bearrašis geat dárbbašedje su. Nu maŋŋit go dán jagi borgemánus, dalle go Finnmárkku Ii fal EU:s lei jahkečoahkkin, šállošii Ruth ahte son ii sáhttán searvat buozalmasvuođa dihtii, ja son ain anii ávvira go muhtin dan čoahkkima oasseválddiin vuojidettiin ruoktot fitne su luhtte ja muitaledje čoahkkimis.

Áiggiid čađa lei Ruth viššalis digaštalli aviissain. Son ii goassege ballan cealkimis maid son oaivvildii, ii ge almmolaččat ii ge servviin masa son searvvai, vaikko dávjá sáhtii leat lossat. Ruth lei su stuora ávviriin ja beroštumiin ovdagovvan midjiide geat rahčat buorit ja vuoiggalaččat máilmmi ovddas.

Finnmárkku Ii fal EU bealis

Arne Pedersen Svein Lund

fylkkajođiheaddji ovddeš fylkkačálli

Til hovudsida.