Artihkkal aviissas Sámiid Hilat, nr. 2 - 1978
Sámiid Hilat lei aviisa man almmuhii / Klassekampen sámegillii ja dárogillii. Eai boahtán go golbma nummara. Artihkkalat čállojuvvojedje dárogillii ja lágádus Jår'galæd'dji jorgalii sámegillii. Dán artihkal lea Svein Lund heivehan dálá čállinvuohkái.

Svein Lund:

Boazosápmelaččat Áisaroaivvis: - Mii dat galggašeimmet duoddara badjel mearridit!

— Sámit dat galggasedje duoddara badjel mearridit. Dan goittot oaivvildit buot boazosámit. Nu čielgasit vástideigga Mikkel Per Persen Sara ja bárdni Mikkel Isak Sára Áisaroaivvis gažaldahkii geain galggasii leat vuoigatvuohta Finnmarkku duoddariidda, sámi álbmogis vai Norgga stáhtas.

- Mun oaivvildan ii leat riekta ahte dusse stáhta galgá mearridit, Mikkel Per Persen Sara joatká. Mis lea uhcan dadjamussan. Muhto mis dat galggasii leat eanemusat maid dadjat. Mii leat guhká dáppe ássan. Mii johtit ja ássat duoddaris. Mii leat riegádan ja bajásšaddan dáppe. Dan dihtii duottar midjiide gullá. Dal duovdat ahte dađistaga manas mannat. Loahpas várra jávka boazodoallu ge. Dulvadeamit ja geaidnorohkadeamit dáhpahuvvet juohke sajis, ja midjiide šaddet unnit ja unnit guohtunguovllut.

- Muhto mii eat sáhte vuollái addit, nu guhká go nagadit boazudoaluin bargat, bártni lasiha.

- Čielggadeamis (Ressursalávdegotti čielgadeapmi, NOU 1978:18) čuožžu ahte dušše «muhtun såmejoavkkut» čuoččuhit ahte Duottar gullá sámiide?
- Dat ii leat duohta. Buohkat, geaid dovdan, oaivvildit seamma: Mii dat galgat Duoddar badjel mearridit, bárdni deattasta.

Mikkel Logje, rávis olmmái gii NBR-as lea áktiivvalaččat bargan, earret eara boazodoallulágain, dadjá maid Sara ge: Dat ii váldde lági ahte Norgga stáhta galgá Duoddar badjel mearridit. Sii han eai dieđe movt dáppe dilli lea, eai ge dieđe movt Duottar galgá geavahuvvot. Sámi lávdegottit dat galggaše sámi guovlluid guorahit.

Álgosiidui

sveilund@online.no