Underteikna er medlem av Naturvernforbundet og støttar i prinsippet forbundet sitt arbeid for å redusere bruken av motorkjøretøy i utmark. Eg støttar også forbundet sin kritikk av den slepphendte dispensasjonspraksisen i mange kommunar. Men når Naturvernforbundet blir brukt til eit angrep både mot Finnmarkslova, Sametinget og samiske institusjonar, og til skuldingar om at samiske organisasjonar er uærlige og har ein skjult agenda om samisk stat, da er eg ikkje med lenger.
Elgvin har lagt fram desse påstandane i intervju der han står fram som leiar for Naturvernforbundet i Finnmark. Med dette gjør han det omtrent umogleg å arbeide for Naturvernforbundet i samiske område, fordi forbundet må bli oppfatta som ein motstandar av kampen for samiske rettar generelt. Eg vonar at både Naturvernforbundet sentralt og fleirtalet i fylkesstyret i Finnmark vil gå ut og ta klar avstand frå dette utspelet. Dersom det ikkje skjer, vil nok mange med meg måtte ta opp medlemskapen i Naturvernforbundet til alvorlig vurdering.
Svein Lund
Guovdageaidnu
PS. For dei som vil sjekke kva som har stått på prent, viser eg til bl.a. Ságat 18.10, Ávvir 23.10 og Finnmark Dagblad 24.10.2008