Cealkámuš Finnmárkku Luonddugáhttenlihtu fylkajahkečoahkkimis, cuoŋománu 5. b. 2014

Prentejuvvon áviissain Finnmark Dagblad ja Ságat 11.04.2014

Eat fuola bieggamilluid Fálesráššii!

Finnmárkku Luonddugáhttenlihtu fylkkajahkečoahkkin vuosttalda Aurora bieggafámu áigumušaid hukset bieggamillorusttegiid Fálesráššii Fálesnuori suohkanis (gaskal Riehppovuona ja Jáhkovuona). Rusttegii leat plánejuvvon 60 bieggamillo ja šattašii stuora luondduvahágin guovllus.

Luonddugáhttensearvi doarju dakkár ruona energiija molssaeavttuid maid luondu gierdá. Muhto mii eat sáhte dohkkehit bieggafápmorusttegiid mat oalát billistit luonddu mii ii leat vel duohtaduvvon ovdal, billistemiid mat hehttejit sihke luonddu máŋggabealatvuođa ja guovllu boazodoalu.

Guovlu lea čáppa duottarguovlu, gos eai leat makkárge billisteamit ovdalaččas, ja doppe leat olu iešguđetlágan šattut ja eallit, ee. jievjaskuolfi. Guovlu lea maid Oarje-Finnmárkku olbmuid árbevirolaš olgonastinguovlu, gos murjejit, rievssahiid bivdet ja jávreguliid bivdet.

Guovlu lea maid dehálaš guohtuneana, bálggoseana ja guotteteana bohccuide. 60 stuora bieggamilluin, luottaiguin ja elfápmolinjáiguin šattašii veadjetmeahttun doaimmahit boazodoalu šat Gearretnjárgga orohagas. Dat mearkkaša ahte kulturguoddi ealáhusa ja ekologalaš vuođustuvvon biebmobuvttadeami vejolašvuođat massojit. Mii doarjut danne Gearretnjárgá 21 orohaga bieggamillopárkka vuosttaldeami gasku sin geasseorohaga.

Mii leat hirpmáhuvvan go dakkár prošeakta lea álggahuvvon searvvis mas ee. Finnmárkkuopmodat lea okta eaiggádiin. Mii ávžžuhit garrasit Aurora bieggafámu geassit ruovttoluotta bieggafápmoáigumušaidis ja OED caggat konsešuvdnaohcama.

Finnmárkku Luonddugáhttenlihtu ovddas
Annie Henriksen ja Svein Lund


Til startsida

sveilund@online.no