Arctic Gold nappo berošta Guovdageain-álbmoga sávaldagain. Muhto maid jus álbmot ii hálit sin ruvkke? Jus servvodat maid álbmot sávvá lea servvodat ođđa stuora luonddubillistemiid haga, mas mii váldit vára meahcásteapmi ja boazodoalu luondduvuođu? Álbmot lea válljen suohkanstivrra, mii guktii lea hilgon Biedjovákki ruvkke, ja álbmoga eanetlogu orru doarjume suohkanstivrra eanetlogu dán áššis. Muhto álbmot ii galgga beassat mearridit jus mearrida boastut, go seamma jearahallamis cealká Eek: "... muhto mu mielas ii galggaše suohkaniin lohpi hilgut máhtu ja árvvu maid dákkár guorahallan buvttášii,".
Maid Arctic Gold duođaid háliida, boahtá ovdan unna bustávaiguin: 17.12.2013, beaivi maŋŋil go suohkanstivra hilgui ruvkeplána, almmuhii fitnodat preassadieđáhusa. Árkka vuollin lei čállon maid fitnodat áigu: "Arctic Golds affärsidé är att bedriva prospekteringsarbete för att hitta och påvisa kommersiellt utvinningsbara guld- och basmetallfyndigheter i Norden. Strategin är att i första hand bedriva prospekteringsarbete och antingen avyttra projekt inom några år eller etablera gruvdrift i egen regi eller i samarbete med andra bolag." Dat mearkkaša ahte fitnodat galgá vuovdejuvvot go boahtá fálaldat mii gokčá oasuseaigádiid goluid ja dasa lassin veahá dietnasa. Dás lea Arctic Golda motivašuvdna.
Jearahallamis mii beassat diehtit ahte váikkuhusguorahallamis leat golbma ulbmila: "– Dat leat geologiija, mii čájehivččii lea go oba vejolaš ge viežžat minerálaid. Teknologiija, movt sáhttá viežžat bajás minerálaid, ja váikkuhus servodahkii mii sihkkarastá ahte árvvut eanemus lági mielde báhcet suohkanii." Maŋimus ášši ii áigon Arctic Gold álggos guorahallat ge, dat bođii easkka maŋŋil go suohkan lei hilgon. Ja váikkuhusat lundui ja boazodollui ii oro Eeka mielas namuhan veara. Báhcá dalle dušše fitnodaga dienas.
Maŋŋil go suohkanstivra hilgui ruvkeplána lea Arctic Gold dahkan ollu vai dattetge beassat álgghit ruvkke:
– geahččalan dubmet suohkanstivraáirrasiid inhabilan
– diŋgon juridihkalaš čilgehusa ahte suohkanstivrra mearrádus lea lobiheapmi
– lohpidan ruđa kultuvrii, skuvlii, dearvvašvuhtii, huksengieddái, luddii jna.
– ožžon báikkálaš fitnodaga oastit ossosiid
Buot fálaldagat doarjut suohkana bohte MAŊŊIL go suohkanstivra lei vuosttaš háve hilgon ruvkeplána. Jus Arctic Gold livččii ožžon doarjaga čuoččuhussii ahte suohkan ii sáhte hilgot, det sii eai livčče dárbbašan fállat maidege. Lea go makkárge sivva jáhkit ahte Arctic Golda servodatberoštupmi olle guhkelii go iežaset bursii?
Svein Lund, Guovdageaidnu