Av SVEIN LUND
Dei to første månadane i år var skatteinngangen 6 millionar eller 7 prosent mindre enn i fjor. Ved utgangen av februar hadde Finnmark ei registrert arbeidsløyse på 4,2 prosent. I tillegg kjem nesten halvparten så mange delvis ledige.
Lodda er borte. Torsken er skinnmager, utan rogn og lever. Selen har jaga fjordtorsken ut på djupet, og for kystflåten fins det knapt ein fisk å få, han går til trålarane og autolinebåtar frå Vestlandet. Trålarane sin andel av torskefisket auka frå 19.3 prosent i 1984 til 57 prosent i fjor.
I følge ein oversikt Finnmark Dagblad har laga, har ein femdel av fiskebruka i fylket ikkje tatt imot ein fisk hittil i år. Dei to første månadane i år tok 40 prosent av fiskebruka i fylket mot mindre enn 100 tonn fisk. Ei rekke bruk er nedlagt eller konkurs, og omlag 250 fiskeindustriarbeidarar er heilt eller delvis permitterte.
Eit resultat av overfiske, av profittjakt og
utilstrekkelige reguleringar, vil del fleste seie. Men
alle
deler ikkje denne oppfatninga. Fiskebåtredernes Forbund
er samanslutninga for dei store fiskebåtane.
Generalsekretæren deira heiter Leiv Grønnevet og var
statssekretær i Fiskeridepartementet under
Willoch-regjeringa. Han seier det slik:
- Ein kan ikkje seie at fiskarane har skyld i at det er
fiska for mye. Kollapsen i loddebestanden kjem
verken av fastsettinga av kvotane eller at fiskarane har
tatt kvotane, men av heilt andre årsakar.
- Kva for årsakar, da ?
- Spør ein biolog. Når det gjeld lodda, er det klart at
denne i stor grad har blitt spist opp av den aukande
torskebestanden. Det er alt for enkelt å gi fiskarane
skylda for nedfiskinga. Fins ikkje fnugg av
dokumentasjon for at fiskarane har utrydda ressursane i
strid med forskarane sine tilrådingar. Det er ikkje
grunnlag for å seie at det hadde vore sild i 70-åa om vi
ikkje hadde fiska i 60-åra.
Det kom som eit sjokk på oss da loddefisket måtte
stoppas. Vi trudde det var sjølve paradegreina for
forskarane.
* Frå 1980 til 1986 blei det fiska 805 000 tonn meir
lodde enn det forskarane hadde tilrådd. I 1986 ville
forskarane ha full stans i loddefisket. Men fiskarlaget
pressa på og fikk fiske. Kanskje for siste gang.
* For 1988 tilrådde det internasjonale havforskingsrådet
ICES ei kvote på 530 000 tonn norsk-arktisk
torsk. Resultatet blei 590 000 tonn. Nesten kvart år har
kvotane blitt satt høgare enn tilrådingane.
* I dag er det så godt som bare 83-årsklassen igjen av
silda. I både 1982 og -83 blei det fiska trass i at
ICES gikk mot.
* I haust gikk Fiskarlaget mot eit forslag frå NNN i
reguleringrådet om utvida maskevidde i trål. Dei siste
fangstoppgåvene viser at 63 prosent av trålfanga torsk no
er på under 500 gram!
* Mot havforskarane si vilje fikk Norges Fiskarlag i
vinter gjennom ein reduksjon i maskevidda for snurrevad
frå 135 til 125 mm.
Lista kunne vore gjort mye lenger, vi kunne nemnt rovfisket på småsei, rekefiske på fjordane osv. osv. Og enno har vi bare nemnt det offisielle, lovlige fisket. Ikkje all småfisken som blir spylt på sjøen, ikkje den som blir øydelagt når snurparane tar så store kast at nota blir sprengt.
Rovfisket held fram. Finnmarkskysten avfolkas. Men årsmeldinga for Fiskebåtredernes Forbund i 1987 kan oppsummere ... en vesentlig bedring av driftsresultatet for trålerne.
Til startsida